د طالبانو د حکومت د هوا پېژندنې ادارې د مې پر درېیمه او څلورمه د افغانستان په ۲۷ ولایتونو کې د باران او واورې ورېدو اټکل کړی دی.
ادارې د مې پر دویمه په بیان کې وویل چې د ورښتونو له وجې په یوشمېر ولایتونو کې د سېلاب امکان دی.
دا په داسې حال کې ده چې په اپرېل کې په افغانستان کې د ورښتونو پر مهال په بېلابېلو پېښو او سېلابونو کې شاوخوا ۸۰ تنه ووژل او لسګونه ژوبل شول.
دا راز، د سېلابونو او بارانونو له وجې سلګونه کورونه او زرګونه هیکټره کرنیزه ځمکه له فصلونو سره ویجاړه شوه او سلګونه څاروي هم ووژل شول.
په اپرېل کې په پاکستان کې هم د ورښتونو او سېلابونو پر مهال تر ۱۴۰ زیات کسان ووژل شول. چارواکي وايي چې بارانونو او سېلابونو د هغه هېواد خیبر پښتونخوا صوبه تر ټولو زیاته ځپلې ده.
